Атырауда мәдениет саласының үздіктері марапатталды

Не болды

Атырау облысының әкімі Серік Шәпкенов өнер майталмандарына мемлекеттік наградалар табыстады. Дина Нұрпейісова атындағы академиялық оркестрдің дирижері Рахилә Ерғалиева "Құрмет" орденімен марапатталды. Ол оркестр құрамында 1990 жылдан бері жұмыс істеп келеді. Еңбек жолын оркестр әртісі боп бастап, бүгінде музыка өнерінің қыр-сырын жетік меңгерген дарынды орындаушы ретінде мойындалды. 

"Қазақстанның еңбек сіңірген қайраткері" атағы Атырау облыстық халық шығармашылығы орталығы басшысының орынбасары Ғабит Қайрекешевке берілді.

Неліктен бұл маңызды

Ол еңбек жолын 1993 жылы қалалық әкімдікте бастаған. Әр жылдары мәдениет саласында басшылық қызметтер атқарып, Құрманғазы атындағы мәдениет сарайын басқарған.

Серік Шәпкенов мәдениет саласы өкілдерімен кездесуде өнердің қоғамның рухани дамуына ықпалы ерекше екенін атап өтті.

"Мәдениет – ұлттың рухани өзегі, халықтың тарихы мен болмысын айшықтайтын құндылық. Мәдени мұраны сақтап, оны келер ұрпаққа жеткізіп жүрген жандардың еңбегі зор құрметке лайық. Мәдениетке қызмет ету – ұлтқа қызмет ету. Бүгін марапат алып отырған азаматтардың өмір жолы – өнерге адалдық пен табанды еңбектің жарқын үлгісі", – деді аймақ басшысы.

Облыс әкімі кездесу соңында өнер иелеріне ризашылығын білдіріп, шығармашылық табыс тіледі.

Материал Атырау облысы әкімдігімен бірлесіп дайындалды.