Ұлытаулық металлургтерге президент атынан марапат табыс етілді

Не болды

Байытушылар күніне орай Ұлытау облысында металлургия саласының үздік мамандары мемлекет басшысының атынан мемлекеттік наградалармен марапатталды. Салтанатты марапаттау рәсімінде ҚР премьер-министрі Олжас Бектенов металлургтерге жоғары мемлекеттік наградаларды табыстады.

Кімдер марапатталды

"Құрмет" орденімен:

• ҚР Өнеркәсіп және құрылыс министрлігі Өнеркәсіп комитетінің "Жезқазғансирекмет" РМК директоры Нариман Абылқанов.

III дәрежелі "Еңбек даңқы" орденімен:

• "Kazakhmys Smelting" ЖШС Жезқазған мыс балқыту зауытының балқытушысы Болат Айдаболов,
• "Жезқазғантүстімет" ӨБ Қарсақпай металлургия зауытының металл құюшысы Бақтияр Аңсағаев,
• слесарь-жөндеуші Сейдахмет Жақашбаев,
• токарь Бүркітбай Оспанов,
• "Жайрем КБК" АҚ карьеріндегі автокөлік жүргізушісі Елхутты Рахымов.

"Ерен еңбегі үшін" медалімен:

• "Kazakhmys" филиалы Жезқазған байыту фабрикаларының флотаторы Гүлбану Жұмадилдинова,
• гидрометаллург аппаратшысы Жүсіпбек Кенбаев.

Металлургтер не дейді

"Мен үшін ерекше күн. Осы салада жұмыс істеп келе жатқаныма 40 жыл толды. Бұл марапат – менің ғана емес, барлық әріптесімнің еселі еңбегінің жемісі", – деді флотатор Гүлбану Жұмадилдинова.

"Мемлекет басшысының атынан награда алу – мен үшін үлкен мәртебе. Барша әріптесімді мерекемен құттықтаймын", – деді балқытушы Болат Айдаболов.

Үкімет басшысының құттықтауы

Марапаттау рәсімінде жиналған жұртшылықты құттықтаған үкімет басшысы Олжас Бектенов сала еңбеккерлерінің ел экономикасына қосқан зор үлесін ерекше атап өтті.