KMF банк лицензиясын алды

Не болды

Қаржы нарығын реттеу және дамыту агенттігі (ҚНРДА) "KMF МҚҰ" акционерлік қоғамына банк операцияларын жүргізуге ресми лицензия берді. Енді ұйым ресми түрде "KMF Банк" АҚ (ағылш. – KMF Bank JSC) атауымен жұмыс істейді.

Толығырақ

Бүгін Алматыда лицензияны салтанатты түрде табыстау рәсімі өтті. Іс-шараға ҚНРДА төрайымы Мадина Әбілқасымова және KMF банк басқармасының төрағасы Шалқар Жүсіпов қатысты.

"Бүгін біз ресми түрде KMF Банкіне банк лицензиясын табыстап отырмыз. Ол Қазақстандағы 23-ші банк болмақ. Жаңа банктің құрылуы – қаржы жүйесін дамытудың кезекті қадамы және кәсіпкерлік қауымдастыққа банк қызметтеріне қолжетімділіктің кеңейетінін көрсететін маңызды белгі. Банктің Қазақстанның банк жүйесінде лайықты қатысушы болатынына сенімдімін. Біз KMF-тің жеке және заңды тұлғаларға арналған базалық банк қызметтерінің кең спектрін ұсынуды жоспарлап отырғанын көріп отырмыз. KMF Банкінің нарыққа шығуы, әсіресе банк инфрақұрылымына қолжетімділігі шектеулі өңірлерде, тұтынушылардың қаржыландыруға қол жеткізу мүмкіндіктерін кеңейтуге, бөлшек несиелеу мен ШОБ-ты (шағын және орта бизнес) қолдау саласында бәсекелестікті арттыруға қуатты серпін береді деп күтеміз", – деп атап өтті Әбілқасымова.

Дамудың жаңа кезеңі басталды

Жаңа банк жеке тұлғаларға, өзін-өзі жұмыспен қамтыған азаматтарға және кәсіпкерлерге қызмет көрсетуді жоспарлап отыр. KMF қаржы нарығында 28 жыл жұмыс істеп келеді және микроқаржыландыру секторында жетекші орынға ие. Екінші деңгейлі банкке трансформациялау процесі аяқталды, ал клиенттер үшін бұл өтпелі кезең барынша жеңіл өтті.

"Біз – микронесие беру секторында көшбасшы орын алған ірі ұйымбыз. Бұл нарықтың төрттен бірі – KMF-тің үлесі, сондықтан трансформация үдерісі біраз уақыт алды. Біз клиенттеріміз үшін МҚҰ-дан банкке жұмсақ әрі кедергісіз өтуді қамтамасыз еттік, енді оларға қаржылық өнімдер мен қызметтердің кең спектрін ұсына аламыз. Біз үшін дамуымыздың жаңа кезеңі басталды және біз банк секторында лайықты орын аламыз деп сенеміз", – деді Жүсіпов.

Клиенттер үшін не өзгереді

Лицензия банкке кәсіпкерлікті қаржыландыруды жалғастырып қана қоймай, жаңа өнімдер мен қызметтерді енгізуге мүмкіндік береді. Олардың қатарында депозиттер, банк шоттарын ашу, аударым операциялары және жаңартылған мобильді қосымша бар.

KMF банк бас кеңсесі Алматыда орналасқан. 17 филиал мен 123 сату нүктесінен тұратын желі шалғай ауылдарды да қамтып, 1,3 млн клиентке, негізінен кәсіпкерлерге қызмет көрсетеді. 31 шілдедегі дерек бойынша, активтері – 395 млрд теңге, несие портфелі – 315 млрд теңге.